लुभेन । नेपालका असाहय, गरिव तथा सडक बालबालिकाहरुको शिक्षा तथा स्वास्थ्यमा क्षेत्रमा सहयोगार्थ बेल्जियममा साँस्कृतिक कार्यक्रम गरिएको छ । चितवन सहायता कोष बेल्जियमको आयोजनामा आइतवार नेपालका ख्याती प्राप्त गायक रामकृष्ण ढकाल तथा गायिका मालिका कार्कीको उपस्थितिमा बेल्जियमको लुभेन शहरमा एक भब्य साँस्कृतिक कार्यक्रम गरिएको हो ।

 पहिलो चरणको औपचारिक कार्यक्रम अन्तर्गत सभापतिको आसनबाट संस्थाकी अध्यक्ष श्रीमती पार्वती अधिकारीले चितवन सहायता कोष बेल्जियम बिशुद्ध सामाजिक सेवामा समर्पित भइ नेपालमा परोपकारी क्षेत्रमा काम गर्दै आएको बताउनु भयो । उहाँले साँस्कृतिक कार्यक्रमबाट आएको रकम पनि बिगतको जस्तै सामाजिक कार्यमा खर्चिने बताउनु भयो । कार्यक्रममा प्रमुख अतिथि नेपाली राजदूताबास बेल्जियमका द्वितीय सचिव लक्ष्मण खनालले चितवन सहायता कोष बेल्जियमले नेपाल र नेपालीप्रति गरेको मानवीय कार्यको सराहना गर्दै परदेशको अति ब्यस्त समयका बाबजुत पनि संस्थाले नेपालमा शिक्षा तथा स्वास्थ्य क्षेत्रमा गरेको सहयोग प्रति प्रशंसा गर्नु भयो । कार्यक्रममा उपस्थित सम्पूर्ण दर्शकदिर्धाहरुलाई स्वागत गर्दै संस्थाको तर्फबाट शान्ति भट्टराईले स्वागत मन्तब्य राख्नु भएको थियो ।

उक्त पहिलो चरणको कार्यक्रम सस्थाका सदस्य विश्व अर्यालले संचालन गरेका थिए भने कार्यक्रममा एन आर एन बेल्जियमका आई सी सी सदस्यत्रय रबिन्द्रमान श्रेष्ठ, अर्जुन कुमार श्रेष्ठ, पिजी शेर्पा लगायत नेपाली संघ सस्था का अध्यक्ष तथा प्रतिनिधि साथै अन्य नेपाली हरुको उपस्थिति रहेको थियो । दोश्रो चरणको साँस्कृतिक कार्यक्रममा नेपालबाट आउनु भएका ख्याती प्राप्त सुमधुर तथा कर्ण प्रिय स्वरका धनि गायक रामकृष्ण ढकालको अति मर्म स्पर्शी गीतहरुको माध्यमबाट उपस्थित दर्शकहरु मन्त्रमुग्ध बनेका थिए भने अर्की चर्चित गायिका मल्लिका कार्कीले समेत आफ्नो गीत प्रस्तुत गरेकी थिईन । 3 साँस्कृतिक कार्यक्रम अन्तरगत यूरो नेपाल कलाकार संघ बेल्जियमका कलाकारहरुले समेत आफ्नो नृत्य प्रस्तुत गरेका थिए भने पछिल्लो चरणको साँस्कृतिक कार्यक्रम सोफिया महर्जन कार्कीले संचालन गरेकी थिईन । कार्यक्रमा नेपालीहरुको उल्लेखीय उपस्थित रहेको थियो ।