जनकपुर, ५ असार । पूर्व राजा ज्ञानेन्द्र शाह बुधबार जनकपुर आउन लाग्नु भएको छ । यसअघि उहाँ २०६६ साल चैत्र १२ गते रामनवमीको अवसर पारी जनकपुर आउनुभएको थियो ।

जनकपुरमा उहाँले नागरिक अभिनन्दन कार्यक्रममा उपस्थित सहभागीहरुलाई सम्बोधन गर्ने कार्यक्रम समेत राखिएको छ । आज बिहान साढे ११ बजे पूर्व राजा शाह सिमराबाट जनकपुर आइपुग्नुहुनेछ । जनकपुर आइपुगे लगत्तै उहाँ पूजा आराधनाका लागि जानकी मन्दिर पुग्नुहुनेछ । जानकी मन्दिरका महन्थ राम तपेश्वर दास लगायत उत्तराधिकारी राम रोशन दास र मटिहानी मन्दिरका मान महन्थ जगन्नाथ दासले उहाँको भब्य स्वागत् गर्ने कार्यक्रम रहेको बुझिएको छ ।

जानकी मन्दिरमा पूजा आराधना सकेर उहाँ अपरान्ह ३ बजेसम्म जनकपुरको होटेल जानकीमा आराम गर्नुहुने जानकारी प्राप्त भएको छ । ३ बजेसम्म उहाँले जनकपुर वरिपरिका क्षेत्रका विशेष ब्यक्तिहरुसित होटेलमै भेटघाट गर्ने कार्यक्रम रहेको सञ्चार ब्यवस्थापक अस्मिता भण्डारीले जानकारी दिनुभयो ।

यसैबीच, पूर्व राजा ज्ञानेन्द्र शाहको विरोधमा जनतान्त्रिक तराई मुक्ति मोर्चा राजन समूहले दुई दिने धनुषा र महोत्तरी बन्दको आव्हान गरेको छ । शोषण र उत्पीडनमा परेका मधेशी जनतालाई फेरी पूर्व राजा ज्ञानेन्द्रले सत्तामा आउने भ—याङको रुपमा प्रयोग गर्न चाहेको आरोप लगाउँदै मोर्चाले बुधबार र बिहीबार दुवै जिल्ला बन्दको आव्हान गरेको हो ।