२ असार, काठमाडौं- चुनावको मिति घोषणामा असन्तुष्टि जाउँदै सरकार विरुद्ध आन्दोलन गरिरहेका दलहरुले गरेको आज नेपाल बन्दले देशभरीको जनजीवन प्रभावित भएको छ । बिहानैदेखि गरिएको बन्द अहिले बेलुका ५ बजेदेखि खुलेको छ । दिनभरीको बन्दमा कहाँ के भयो खबरपार्टीको विशेष रिपोर्ट ।


उच्चस्तरीय समितिको बैठक स्थगित

फोरम लोकतान्त्रिक अध्यक्ष विजयकुमार गच्छदारले समितिको नेतृत्व सम्हालेपछि आज बोलाइएको पहिलो वैठक बन्दका कारण स्थगित गरिएको छ । गच्छदारले हिजोदेखि समितिको संयोजकको जिम्मेवारी पाएका थिए ।

सरकारले घोषणा गरेको निर्वाचन र असन्तुष्ट दलहरुको आन्दोलनका विषयमा छलफल गर्न आज दिउँसो ३ बजे बैठक बोलाइएको थियो । समितिका संयोजक गच्छदारले बन्दकर्ताको भावनालाई पनि मध्यनजर गरेर बैठक स्थगित गरिएको जानकारी दिए ।


सञ्चारकर्मीको मोटरसाइकलमा तोडफोड

बन्दको समयमा मोटरसाइकल चलाएको भन्दै कारोवार दैनिकमा कार्यरत सञ्चारकर्मी समिर रेग्मीको मोटरसाइकलमा आक्रमण भएको छ । आफ्नो निवास थानकोटबाट कार्यालयतर्फ आउँदै गर्दा काठमाडौंको कलंकी चोकमा बन्दकर्ताले उनीमाथि आक्रमण गरेका थिए । आन्दोलनकारीले पत्रकार रेग्मीमाथि दुव्र्यबहार गर्दै उनी सवार बा २० प ७६३२ नम्बरको मोटरसाइकलको अगाडीको भाइजर, लुकिङ ग्लास लगायत तोडफोड गरेका हुन । आफू सञ्चरकर्मी भएको भनेर भन्दाभन्दै पनि आक्रमण गरेका उनले बताए । घटनाको नेपाल पत्रकार महासंघ कारोवार दैनिक शाखाले भत्सना गरेको छ ।


सवारीसाधन ठप्प

बन्दका कारण बिहानैदेखि गाडी नचल्दा सर्वसाधरण कठिनाइमा प¬रेका छन् । उपत्याकाबाट बाहिर जाने र भित्रिने गाडीहरु सूचारु भएका थिएनन् । प्रेस कुटनीतिक नियोग, एम्बुलेन्स बाहेक सडकका खासै सवारी साधन कुदेको देखिएन् ।


हेटौडामा ट्रक र मोटरसाइकलमा तोडफोड

बन्दको अबज्ञा गरेर ट्रक चलाएको भन्दै नेकपा माओबादी लगायतका दलका कार्यकर्ताहरुले हेटौडाको बसपार्क नजिकै ना ४ ख ४६०४ नंम्बरको ट्रकमा पनि तोडफोड गरेका छन् । बन्दकर्ताहरुले हेटौंडामा १२ वटा मोटरसाइकल तोडफोड गरेका छन् भने अरु २५ वटा मोटरसाइकल बन्दमा चलाएको भन्दै नियन्त्रणमा लिएर बेलुकीपख छाडेका छन् ।


हेटौंडाका ४ वटा उद्योगमा तोडफोड

बन्दको समयमा पनि उद्योगसंचालन गरेको भन्दै नेकपा–माओबादीलगायतका दलका कार्यकर्ताहरुले  हेटौंडा औद्योगिक क्षेत्रमा संचालन भएका चारवटा उद्योगमा तोडफोड गरेका छन् । बन्दकर्ताहरुले औद्योगिक क्षेत्रमा रहेको गोर्खा लहरी, सिएसआई प्रालि, एशियन पेन्ट, नेशनल कास्टिङ उद्योग प्रालिमा तोडफोड भएको उद्योग संघ ले जनाएको छ ।

 विभिन्न जिल्लामा सवारीसाधन तोडफोड

बन्दको समयमा सवारी साधन चलाएको भन्दै देशका विभिन्न जिल्लामा सवारी साधनमाथि तोडफोड भएको छ ।

खोटाङमा भने अवज्ञा

खोटाङको सदरमुकाम दिक्तेलका व्यवसायीले बन्दको अवज्ञा गरेका छन् । व्यवसायीले  बन्दको विरोध गर्दै सरमुकाममा रहेका पसल तथा बजार संचालन गरेका हुन् । बजार तथा पसल खोलेको भन्दै तोडफोड गर्ने २ जनालाई प्रहरीले पक्राउ गरेको छ ।

जबरजस्ती बजार बन्द गराउँदै तोडफोडमा उत्रेका संघीय समाजवादी पार्टी खोटाङका सहसचिव  जितेन राई र वैद्य नेतृत्वको नेकपा माओवादी अखिल क्रान्तिकारीका सदस्य बबी राई पक्राउ परेका हुन् ।

- KhabarPati.com

General strike by 42 parties- special report of Nepal Banda 2nd Ashad 2070