३ असार, काठमाडौं । ठूलो रकमको कारोबार गर्ने ब्रोकर कम्पनीले सोमबार कारोबार गर्न नपाएपछि नेपाल स्टक एक्सचेन्जमा तुलनात्मक कम रकमको कारोबार भएको छ । यद्यपि बल्कमा सेयर खरिदबिक्रीले भने निरन्तरता पाएको छ । सेयर धितो राखेर कर्जा लिने ऋणीले सेयर लिलामी हुनबाट रोक्न आफैं बिक्री गरेर ऋण चुक्ता गर्न थालेका छन् ।

आज सेयर खरिदबापतको पैसा समयमा भुक्तानी नगरेको कारण सात वटा कम्पनीको कारोबार नेपाल स्टक एक्सचेन्जले रोक्का गरेको थियो । आइतबार ११ करोड रुपैयाँभन्दा बढीको कारोबार भएको थियो भने आज ७८ कम्पनीको ३ करोड ७७ लाखको मात्र कारोबार भएको छ । बल्कमा कारोबार भएका कम्पनीको सेयर मूल्य घटेको कारण नेप्से परिसूचकमा १.५४ अंकले गिरावट आई ४९३.३७ अंक कायम भएको छ ।

बैंक अफ काठमाण्डूको सेयर मूल्य हिजोको तुलनामा ४ रुपैयाँ घटेर प्रतिकित्ता ५७० रुपैयाँको दरमा १३ लाख ७२ हजारको कारोबार भएको छ । सिभिल बैंकको सेयर पनि १ रुपैयाँ घटेर १४८ रुपैयाँका दरले १७ लाख ३५ हजारको बिक्री भएको छ ।

चिलिमे हाइड्रोपावर कम्पनीको सेयर मूल्य ४ रुपैयाँ घटेर ११३५ रुपैयाँको दरले २१ लाख ४६ हजारको बिक्री भएको छ । एभरेष्ट बैंकको सेयर ९० लाख रुपैयाँको बिक्री भएको छ । यो बैंकको सेयर १५२५ रुपैयाँमा कारोबार भएर अन्तिम एउटा कारोबार मात्र १५३९ रुपैयाम्ा भएको कारण हिजोको तुलनामा १४ रुपैयाँ बढेको छ ।

आइएलएफसीओ फाइनान्सको १२६ रुपैयाँको दरमा २५ लाखको कारोबार भएको छ । यो कम्पनीको ठूलो कारोबार कहिलेकाहीं मात्र हुने गर्दछ । नबिल बैंकको सेयर पनि १८ रुपैयाँ घटेर १७२० रुपैयाँको दरले २५ लाखकै बिक्री भएको थियो । बंगलादेश बैंकको सेयर ५ रुपैयाँ घटेर १९४ रुपैयाँको दरले २३ लाख कित्ता बिक्री भएको छ ।

नेपाल इन्भेष्टमेन्ट बैंकको सेयर मूल्यमा पनि २ रुपैयाँ घटेर ७२२ रुपैयाँको दरमा १७ लाखको बिक्री भएको छ । नेपाल लाइफ इन्स्योरेन्सको ११३९ रुपैयाँको दरमा २१ लाखको बिक्री भएको छ । नेपाल लाइफको मूल्य भने २ रुपैयाँले बढेको छ । प्राइम बैंकको पनि ५ रुपैयाँ घटेर ३२१ को दरमा १८ लाखको कारोबार भएको छ । स्ट्याण्डर्ड चार्टर्ड बैंकको मा १२ लाखको कारोबार भएको छ । चार्टर्ड बैंकको कारोबार पनि १८०० रुपैयाँमा भएर अन्तिममा एक कारोबार १ रुपैयाँ बढाएर गरिएको कारण अघिल्लो दिनको तुलनामा १ रुपैयाँ बढेको छ ।

# Onlinekhabar