४ असार, काठमाडौं । जहाज अभावमा साख गुमाउँदै गइरहेको नेपाल बायुसेवा निगमले दुई नयाँ जहाज खरिदका सवैभन्दा महत्वपूर्ण मानिएको खुडकिलो पार गरेको छ । दुई जहाज खरिदका लागि ऋण दिन सैद्धान्तिक सहमति जनाएको कर्मचारी संचय कोष र निगमवीच मंगलबार ऋण सम्झौतामा हस्ताक्षर भएको छ । सम्झौतासँगै निगमले युरोपेली जहाज निर्माता कम्पनी एयरबसका दुई सानो आकारका जहाज किन्ने प्रकृया अगाडी बढेको छ । सरकारको जमानतमा कोषले निगमलाई एयरबस खरिदका लागि १० अर्ब रुपैयाँ ऋण दिने भएपछि २०७१ फागुन महिनामा पहिलो जहाज नेपाल आइपुग्ने भएको छ ।

ऋण सम्झौतापत्रमा निगमका प्रबन्ध निर्देशक मदन खरेल र सञ्चय कोषका कृष्णप्रसाद आचार्यले हस्ताक्षर गर्नुभयो । निगमले एयरबससँग ३२०-२०० सिरिजका दुई ‘न्यारो बडी’ विमान खरिद गर्न गत चैत २३ गते सम्झौता गरेको थियो । सम्झौता अनुसार निगमले वैशाखमा बैनास्वरुप ५ लाख डलर एयरबसलाई पठाएको थियो । एयरबसले दूई चरणमा नेपाललाई विमान उपलब्ध गराउने सम्झौता भएको छ । पहिलो जहाज नेपाल भित्रिएको २ महिनापछि दोश्रो जहाज दिने एयरबसले बाचा गरेको छ ।

कोषले ऋण प्रदान गर्नका लागि निगमले खरिद गर्ने दुई विमान, निगमको न्युरोडस्थित केन्द्रीय कार्यालय र सिनामंगलको जग्गा धितोमा राख्ने भएको छ । निगमले १२ प्रतिशत ब्याजमा ऋण लिन लागेको हो । सम्झौतापत्रमा निगमले व्यापारीक उडान सुरु गरेको १५ वर्षभित्र ऋण चुक्ता गर्नुपर्ने उल्लेख छ । निगमले ऋणको ब्याजमात्र १ अर्ब २० करोड रुपैयाँ बुझाउनुपर्ने हुन्छ । सम्झौताअनुसार निगमले त्रैमाषिक रुपमा कोषलाई ३५ करोड रुपैयाँका दरले बुझाउनुपर्छ । निगमले असोज, पुस, चैत र असारमा किस्ता बुझाउने सम्झौतापत्रमा उल्लेख गरिएको छ ।

विमानको समष्टिगत बीमालेखा निगमले आफ्नो खर्चमा खरिद गर्नुपर्ने भएको छ । निगमले टिकट बिक्रिबाट प्राप्त हुने कुल आम्दानीको ३० प्रतिशत रकम कोषले तोकेको बैंकमा विशेष कोष खडा गरेर मासिक रुपमा जम्मा गर्नुपर्ने हुन्छ । कोषमा महिनाको १५ करोडका दरले जम्मा गर्ने र तीन/तीन महिनामा कोषको ऋण तिर्ने व्यवस्था गरिएको छ । जहाज खरिद भएपछि नेपालको पर्यटन विकासमा थप टेवा पुग्ने निगमका महाप्रबन्धक मदन खरेलले बताउनुभयो ।

निगमलाई उपलब्ध गराएको १० अर्ब रुपैयाँ ऋणमा निगमलाई जोखिम नरहेको कोषका प्रशासक कृष्णप्रसाद आचार्यले बताउनुभयो । कोषको आम्दानी बढाउन ऋण प्रवाह गरेको उहाँले बताउनुभयो ।