अनुगमनका क्रममा गठी गरेको पाईएका व्यवसायीहरुलाई सरकारले कारबाही नगर्ने प्रतिबद्धता जनाएपछि सुन व्यवसायीहरु सहमतिमा आएका छन् । दश दिनदेखि बन्द सुनचाँदी पसलहरु खुलाउने सहमति भएको छ । सुनचाँदी व्यवसायीहरुले आन्दोलन सबै कार्यक्रम फिर्ता लिएपछि आजबाट सबै सुनचाँदी पसलहरु खुल्ने भएका हुन् । सरकार र व्यवसायीबीच हिजो भएको वार्तामा सुनचाँदी व्यवसायीका समस्या समाधान गर्ने सहमति भएपछि आन्दोलनका सबै कार्यक्रम फिर्ता भएको नेपाल सुनचाँदी व्यवसायी संघका अध्यक्ष मणिरत्न शाक्यले सीआईएनलाई जानकारी दिनुभयो ।


हिजोको छलफलबाट वाणिज्य तथा आपूर्ति मन्त्रालयको संयोजकत्वमा सरकारका तर्फबाट पँच जना र व्यवसायीका तर्फबाट चार जनाको कार्यदल बनाइएको छ । कार्यदलको सोमवार बस्ने बैठकपछि योजना तर्जुमा गर्ने र काम अघि बढ्ने सहमति भएको छ । कार्यदलले सुनचाँदी व्यवसायीलाई कारवाहीका लागि अनुगमन मापदण्ड पनि तयार गर्ने भएको छ । सरकारले केही दिनअघि केही सुनचाँदी पसलहरुमा गरेको अनुगमनका विषयमा पनि छनविन भइरहेको छ । दश दिनदेखि सुनचाँदी पसल बन्द हुदा सरकारलाई हरेक दिन करिब डेढ करोड राजस्व घाटा हुने गरेको छ ।